Candi

Candi - Cicalengka 

Pernahna di Desa Dampit (Saacan ka Curug Cindulang). saliwat mah sok jiga candi borobudur matak masarakat Calengka nyebutna "Candi". Kadang oge lamun batur aya nu nanya "mana Candi-na?"

sok di jarawabna teh "Candi-bangun" atawa "Candi-teang", sakapeung mah sok jadi bahan keur heureuy.

Lamun ngaliwat ka "Candi" bawaana sok hayang eureun heula. Sabab sok hayang nempo mobil anu jadi laleutik atawa nempo bandung teh jiga katel sabab dikulilingan ku gunung hungkul. loba gunung anu kaciri anu jelas pisan mah gunung Kerenceng di daerah Cimanggung - Parakan Muncang.

Unggal pasosore atawa malam minggu "Candi" pasti rame wae ku nonoman anu bobogohan atawa anu sakadar popotoan.

Kantor Kacamatan Cicalengka

Sasana Sawala Cicaléngka diadegkeun nalika Cicaléngka jadi Afdelling (Kota Administratif). Sasana Sawala ayana di payuneun kantor Afdelling. Keur jaman aya kénéh kawadanaan. Kantor Afdelling jadi kantor Kawadanaan. Cicaléngka anu ngawengku Kecamatan Cicaléngka, Rancaékék sareng Cileunyi, ayeuna éta Kacamatan téh parantos dimekarkeun. Cicaléngka jadi tilu. (Cicaléngka, Nagrég jeung Cileunyi). Cileunyi jadi tilu. (Cileunyi, Ciléngkrang jeung Cibiru, tapi ayeuna Cibiru asupna ka Kota Bandung). Iwal Rancaékék hungkul anu teu mekar. Sabada medal Undang-undang otonomi daérah (UU no 22. Taun 1999) Kawadanaan dipupus (teu aya deui struktur Pamaréntah tingkat Kawadanaan). Kantor Kawadanaan ayeuna jadi kantor Kecamatan Cicaléngka.

Sasana Sawala dijaman Afdelling tug ka kiwari masih angger jadi tempat sawala (musawarah). Rumengkep jeung Balé Rancagé (kréatipitas). Sawala mah kaitung langka, paling kerep ogé sataun sakali. Tapi ari pintonan karancagéna nonoman mah kaitung remen sakurang-kurangna sabulan sakali. Konstruksi wangunan Balé Sawala, satengah jandéla ku batu hirup (batu susukan), kaluhurna kawitna mah papan, lajeng diréhab jadi ku bata. Jandéla anu digunakeun nyaéta jandéla rakocék (anu dibagi genep garisna). Dibagian luarna ditutup ku jandéla jalosi (malang ditengahna tapi nyangéyéng ka handap). Ayeunamah éta wangunan téh tos di rénopasi konstruksina jadi beton jeung kenténg aluminium. Baheula mah suhunan téh ku jati, kenténg na kenténg barong (aya belenongan/buleud).

Sasana Sawala ukurana 16x20m. Buruanana lega. Baheula mah komplék téh legana sahéktar. Ayeuna mah kari 0,6 héktar. Da gédéngeunana di anggo kantor nu lian sapertos Bank, Kooprasi, jsb.

Sumber : Pa Dadan Dania.