Isuk-isuk barang jol ka kampus kaciri barudak geus ngarumpul di kantin
anu biasa di cicingan. Kuring langsung
nyampeurkeun barudak anu keur ngarobrol
bari ngopi.
Kuring gék nimbrung bari sasalaman. Tuluy mesen kopi ka Mang Nana. Tukang dagang anu ngajual
goréngan jeung kopi.
“Karék datang euy?” Tanya si Déde bari nuluykeun nyuruput kopi.
“Heueuh biasa angkotna ngetém.” Témbal
kuring bari gék sisieun si
Ican.
Teu lila kopi datang. Suruput kopi. Tuluy nyeungeut roko. Duh kacida
ngeunahna. Keur mah hawa
meujeunhna tiis kénéh. Ditambah ngariung babarengan jeung barudak. Ngobrol
kaditu-kadieu ngomongkeun kajadian anu
kamari. Atawa kajadian anu
geus lila, tapi teu weléh bosen dicaritakeun
deui.
Barakatak seuseurian ngadéngé carita si Graha
anu teu nyambung jeung teu kaharti malahan mah. Tuluy pada nyepétan. Da ari budak ngora mah
resep pisan pasepét-sepét téh. Méh
akrab canah mah.
Teu lila barudak awéwé ngageroan sabab
ayeuna téh aya pembekalan keur engké
kkl (kuliah kerja lapangan) ka Baduy - Banten. Gura-giru nyarokotan
tas bari pamit ka Mang Nana tuluy
arindit ka kelas anu geus di tangtukeun. Nalika pembekalan
kabéh mahasiswa dibéré pancén jeung sajabana. Disebutkeun ogé aturan-aturan di Baduy anu teu meunang di rumpak. Soalna urang salaku sémah kudu bisa ngaluyukeun jeung
adat kabiasaan urang ditu. Jeung supaya ditarima ku masyarakat Baduy.
Bérés pembekalan
kabéh langsung barubar. Aya anu
nangkring heula di kampus. Aya anu
ngadan bobogohan. Aya ogé anu ngécéng pédah acan barogaeun kabogoh. Ari kuring mah
langsung pamit balik. Sabab
rék nginjeum tas ransel keur isuk indit
ka
Baduy.
Barang nepi ka lembur tuluy kuring kateun Mang Didin. Ngahaja rék nginjeum tas ransel sabab manéhna mah
budak pencinta alam. Tayohna bakal
bogaeun tas anu ku kuring dipikabutuh téh. Geus meunang mah tuluy pamit balik
ka imah keur nyiapkeun barang-barang anu rék
di bekel keur isuk.
Meungpeung geus aya tasna jadi langsung
diarasupkeun barang pibekeleun téh.
“Jang mekel naon waé?” Cék Ema bari ngabantuan mérésan baju.
“Ah paling ogé raksukan sareng tuangeun waé Ma.” Témbal kuring bari néang calana
sontog anu rék
dipaké isuk.
“Moal mekel duit Jang?” Sambung Ema.
“Alah di leuwueng ieu moal aya warung, Ma. Cacakan warung, kapan listrik waé ogé teu acan lebet ka Baduy mah.” Teges kuring.
“Enya atuh ari kitu mah. Kajeun mekel dahareun wéh Jang.”
“Muhun hatur nuhun Ma.” Témbal kuring.
Geus kabéh barang disiapkeun. Kuring
tuluy kaluar. Biasa ari budak ngora mah sok gampang bosen di imah téh. Komo lamun euwueh pagawéan deui mah. Ngider
wéh mening ogé.
Sanajan teu kabeh budak ngora resep
ulin. Da ari kuring mah jelemana beuki ulin.
di jalan panggih jeung si Giri, Galih ogé si Adul. Keur ngarobrol. Kuring nyampeurkeun.
“Urang isuk rék indit ka Baduy euy!” Cék kuring bari atoh.
“Wah hayang milu euy!” Témbal giri.
“Teu bisa atuh euy da ieu mah acara
kampus.” Teges kuring.
“Geus wéh cicing manéh mah Giri éta bisi Ma Itoh
ménta tulung pangmeulikeun béas ka pasar.” Sambung Galih bari semu ngaléléwé.
“Ah aing mah padahal hayang nyaho urang Sunda anu asli euy. Ari urang mah apanan
turunan Jérman.” Jawab Giri
bari ngabarakatak
seuri.
“Har silaing mah lain turunan Jérman tapi turunan siluman” témbal Adul bari néké si Giri.
didinya kuring tuluy silih hina bari
seuseurian.
“Ménta oléh-oléh heueuh?” Cék si Giri bari ngaharéwos kana ceuli.
“Heueuh gampang lah seuseuheun mah pasti
di bekel deui.”
“Ah manéh mah angger sok kaluman” témbal Giri bari ngajengut sirah.
“Heueuh kumaha
engké onta.” Jawab kuring bari ngélékéték si giri méh ngaleupaskeun leungeuna
dina buuk.
Tuluy ngobrol deui ngeunaan kasundaan.
Enyana kuring teu pati nyaho kana kasundaan ogé tapi sok didéngékeun wéh ku
barudak pédah kuring mah kuliah di sastra sunda. Sanajan kitu ogé lumayan wéh
ari anu ditepikeun ku
dosen di kampus ku kuring sok ditepikeun
deui ka barudak pédah hayang apal cenah saeutikna ngeunaan kasundaan.
Geus teu karasa sakeudeung deui magrib.
Kuring jeung barudak bubar ka imahna séwang-séwangan. Nepi ka imah kuring tuluy mandi. Geus mandi
tuluy indit ka masigit. Balik di masigit tuluy dahar. Lumayan lah aya angeun
kacang. Dahareun kabeuki kuring ti leuleutik. Sabérésna dahar tuluy mariksaan
deui barang anu geus di arasupkeun
kana tas. Bisi aya anu
katinggaleun.
“Geus kabéh lengkep lah”. Omong kuring jero hate.
Tuluy diampihan tasna kana lomari. Teu lila Ema nyampeurkeun.
“Jang geus dipariksa barang téh?”
“Atos ma, lengkep lah!” Témbal kuring.
“Oh, ari pakakas keur mandi dibarawa teu?
Kadé sikat huntu teu kabawa hayoh batur baueun!” Cék Ema bari nyengir.
“aduh muhun hilap ma. Untung wéh diémutan, meuntaeun mah tinggaleun.” Jawab
kuring bari tuluy ka kamer cai mawa sikat huntu.
Saenggeus
diasupkeun kana tas tuluy ngobrol deui jeung Ema.
“Ma kantos teu acan ka Baduy?” Tanya kuring.
“Teu acan Jang. Ema mah cicing wéh di lembur
barinagé rék
naon kaditu ari euweuh téanganeun mah. Ongkohna deuih kudu make duit kaditu téh.” Jawab Ema.
“Oh. Atuh ema teu terang aya urang Sunda asli diditu?” Kuring nanya deui.
“apal jang. Da ema ogé urang sunda asli. Matak ti leuleutik ngajarkeun manéh basa Sunda ogé.” Jawab ema bari nepakan taktak.
“Muhun nya leres.” Témbal kuring bari
seuri.
“Atos Ma ah, ujang badé dug heula. Palay geura énjing.” Sambung
kuring.
“Solat isa heula kahadé poho.” Témbal Ema.
“Muhun Ma.” Jawab kuring.
Kuring indit ka kamer cai. Abdas. Tuluy
solat. Bérés solat langsung dug ka enggon.
Isuk-isuk Ema ngahudangkeun. Nitah solat subuh.
Tuluy gura-giru mandi. Geus mandi
tuluy dahar méh aya tanaga keur di jalan. Kuring pamit ka Ema.
“Sok kahadé di jalan sing disalametkeun.
Ulah loba pamolah.”
“Muhun ma, Ujang angkat heula assalamualaikum.”
“Waalaikumsalam”. Témbal Ema bari
ngusapan.
Kuring
leumpang mapay gang andu. Geus nepi jalan tuluy naék angkot. Barang nepi ka kampus tuluy ngumpul jeung
kelompok anu keur ngariung
deukeut beus. Di absén heula ku dosén hiji-hiji bisi aya anu tinggaleun.
Geus karumpul kabéh tuluy ngadu’a
babarengan sangkan dibéré
kasalametan. Tuluy unggal kelompok dititah asup kana beus. Gék diuk dina bangku sewang-séwangan. Tungtungna beus maju.
“Baduy, urang datang!” Gorowok kuring dina jero beus ditémbal ku barakatak
barudak.
Salila di jalan. Kuring ngacapruk jeung barudak.
Aya anu saré, aya anu ngagiling, aya anu popotoan, aya ogé anu ongkék keur
saré. Jiganamah teu biasa naék mobil jauh. Gura-giru diubaran ku barudak jeung
dosén.
Geus teu karasa nepi ka Cibolégér. Kuring jeung barudak tuluy
popotoan dihareupeun tugu patani. Lumayan lah keur panineungan. Teu lila dosén
nitah kabéh mahasiswa ngarumpul. Mahasiswa jeung Dosén tuluy arasup ka wilayah Kanékés. Ngarumpul heula di hareupeun imah Jaro Dainah. Didinya Jaro Dainah méré talatah ka kabéh Mahasiswa sangkan ulah ngarumpak aturan
anu aya di Kanékes.
Tuluy sing tarapti dina sagala hal. Ulah nepi ka picilakaeun. Geus bérés.
Mahasiswa jeung Dosén
tuluy ngadu’a.
Bring unggal kelompok laleumpang kajero
Baduy. Kuring ngarasa atoh, tapi ngarasa sieun ogé. Atohna mah kusabab kuring
kakaraeun kadieu jeung bisa ninggali langsung kahirupan urang sunda anu asli.
Maksud téh anu acan
kabeungkeut ku moderenisasi. Kasieunna mah, sieun aya nanaon. Sabab ieu téh
leuweung sakral anu kacida keueungna. Sedengkeun kuring sieun ngalakukeun hal anu bisa disebut ngarumpak kana
aturan didieu. Tapi kuring teu loba tingkah. Tuluy leumpang mapay jalan satapak
anu dikurilingan ku tatangkalan laleubeut jeung hérangna walungan. Sajajalan
kuring mindeng pasalingsingan jeung urang Baduy asli. Sok hayang ngobrol mah,
ngan sieun ditinggalkeun ku kelompok.
Leuit ting jaléjér. Sakapeung euweuh
nanaon iwal tangkal. Tuluy manggih imah
panggung.
Paling kana salapan atau
sapuluh imah. Unggal nempo ka tepasna. Sok kaciri aya awéwé anu keur nenun
benang anu rék
dijieun iket atawa soléndang. Tapi aya anu
ngajieun kuring kacida olohokna. Nyaéta
awéwéna kabéh gareulis jeung beresih
beungeutna. Euweuh anu katempo make make
up. Kabéh alami. “subhanalloh” cék kuring dina jero hate. Kuring tuluy
leumpang. Kaciri barudak leutik narempokeun. Meureun aranéheun jigana mah sabab maranéhna mah jarang nempo
arurang. Ditambah papakéan anu diparaké
téh warna beureum kabéh sabab baju KKL taun ayeuna mah
warnana beureum. Ogé marawa tas badag sagala. Aya anu seuri aya anu ngadan nyumput budak téh.
Pikaseurieun.
“Aduh cape euy!” Si Asép ngomong bari ngagubragkeun manéh.
“Heueuh sarua cape urang ogé, keur mah jalana nanjak tuluy jaba
leumpang teu eueureunan.” Jawab kuring bari eureun ngadagoan si Asép.
“Ripuh euy tara leuleumpangan téh.
Karuatan jigana nya urang dieu mah!” Témbal Asép bari hah-héh-hoh.
“Éh ulah salah. Urang dieu mah sanajan
tara putsal atawa narik béca jiga di lembur urang ogé, tapi bitisna jaradi. Budak sagedé
urang waé tara paritnes gening deuleu ku manéh awakna haradé.” Teges kuring
bari rada nyengir.
“Heueuh bener euy. Teu kudu kasentét
gara-gara pitnes jeung teu kudu ngaluarkeun duit keur meuli susu anu keur ngahadékeun awak téa gening.” Témbal Asép bari nyakakak seuri.
“Geus hudang ah. Hayu manéh téh urang geus
di tinggalkeun ku barudak Sép.”
Cék kuring bari ngabedol leungeun si Asép.
“Heueuh hayu atuh”. Témbal Asép bari nangtungkeun
manéh.
Kuring jeung Asép rada gancang leumpangna. Soalna
sieun tinggaleun jauh
ti kelompok. Anu paling sieun mah kuring nyasab didieu. Unggal imah anu kaliwat, kuring sok tatanya ka
ibu-ibu atawa wanoja anu keur nenun di tepas. Nanyakeun kamana arah rombongan kelompok kuring tuluyna. Ditunjukeun kaditu-kadieu. Leumpang beuki
gancang, untungna kapanggih. Ari pék téh kelompok kuring ogé keur caringogo da carapéeun,
sawaréh aya anu
gogoléran dina luhureun ransel
anu eusina baju hungkul. Tapi anu kantongna di buruhkeun mah ngan ukur
caringogo bari ngarinum cai hérang. Kaciri ngoprotna késang anu kaluar.
“Haduh ampun capé.” Gorowok Téh Époy.
“Sing sabar nya néng!” Témbal Dosén anu ngabingbing bari motoan kaayaan
sakulilingeun. Kadang ogé motoan ékspresi
barudak anu jaramedud.
Kuring sok kadang cungar-cengir sorangan nempo barudak jaramedud. Tuluy kuring
leuleumpangan da hayang ninggali alam anu kacida éndahna. Kuring neuteup. Jero.
Mapay sirah gunung nepi ka batu anu aya di walungan.
“Duh Gusti. Pangéran sajati. Kacida kawasana
anjeun nyipta kahirupan anu teu disangka. Geuning dijero leuweung anu kacida
jerona anjeun ngatur kahirupan anu lancar. Malah mah gemah ripah loh jinawi téh
karasana mah di tempat anu kieu geuning. Di tempat anu dimana jelema tara loba
ngomong. Tapi loba gawéna. Di tempat anu dimana jelema tara mikiran harta. Tapi
mikiran kabagja keur balaréa. Dimana jelema tara loba dalil diumbar. Tapi sukma
anu raheut jerona. Dimana lojor teu
meunang di potong. Pondok teu meunang di sambung.leuwih teu meunang di kurang.
Kurang teu meunang di tambah. Allohuakbar.”
“Euy ngalamun waé!” Cék Kang Hérmawan bari ngareungreuwas.
“Henteu Kang. Ieu keur nempo éndahna dunya. Surga
dunya maksud téh.” Témbal kuring bari seuri.
“Hahaha. Heueuh tiis ceuli hérang panon
euy didieu mah. Béda jeung di kota. Knalpot motor garandéng. Jaba panas deuih da tangkal geus
di barabadan.”
Témbalna bari
siap-siap indit deui.
“Hayu ah maju deui. Geus teu pati cape teuing
kan?” Ajak Pa
Baban
semu nanya.
“hayu pa, méh énggal dugi.” Témbal Téh Péra.
Kuring
jeung kelompok tuluy narangtung deui. Bring maju. Teu lila dihareup geus kaciri
tanjakan. Atuh langsung pada ramé kukulutus. Kuring sok hayang seuri ari geus
kieu téh. Komo si Asép
mah nepi ka nenggeulan tuur jeung bitis na. Ngahaja méh kuat senah. Kuring
didinya nyakakak sabab teu kuat hayang seuri nempo sukuna anu geus ngadégdég.
Kaciri di tukang aya dua urang Bapa-bapa
anu
mawa awi di tanggeuy dina taktak. Tanggeuyanna
téh
pinuh ku tas awéwé anu muruhkeun. Didinya barudak langsung jarempé olohok teu
percaya. Manéhna mawa babawaan anu beurat. Naék kana tanjakan. Didinya barudak
langsung sarumanget. Bari leumpang bari seuseurian teu percaya ninggali anu
bieu ngaliwat.
Sajam, dua jam, tilu jam, opat jam.
Tungtungna mah nepi ogé ka tempat anu di tuju. Nyaéta Désa Cikadu. Kaasupna ka Baduy
luar. Tapi pangtungtungna ti belah kulon mah. Ogé mangrupakeun kampung anu jadi
wates antara Baduy luar jeung Baduy
jero. Kaciri barudak ngagalolér di tepas
jaro kampung cikadu. Warga barijil narempokeun kadatangan kelompok. Tuluy aya anu méré lahang. Malahan mah aya anu méré kadu sagala. “Duh mani barageur.” Cék kuring na jero
hate. Teu karasa langit geus poék. Nutup kacapé dina poé mimiti.
Isuk-isuk barudak dihudangkeun ku Pa Baban. Dititah arindit ka walungan bari marandi. Geus marandi tuluy néangan data anu
dipancénkeun ku dosén. Datana téh
ngeunaan obat tradisional. Geus bérés nanyaan data tuluy ngobrol kaditu-kadieu jeung warga. Cacakan
basa na rada béda. Pédah teu make undak
usuk basa. Tapi rada nyambung ngobrol mah. Bérés ngobrol téh tuluy
nyampeurkeun barudak leutik anu keur arulin di buruan. Ngahaja hayang miluan
ulin. Hayang apal pangpangna mah
kaulinan barudak urang Kanékés.
Peutingna ngobrol jeung pemuda
anu saumuran. Tuluy nanyaan ngeunaan kahirupan didieu. Di Baduy anu kacida tengtremna.
Teu karasa geus tilu poé kuring jeung
réngréngan cicing di dieu. Kabéh barudak pamit mundur rék balik. Saacan balik, kabéh warga
dikumpulkeun. Sabab barudak hayang popotoan heula jeung warga. Geus bérés popotoan tuluy pamit. Indit ka Cibolégér tempat ngumpul kabéh kelompok.
Aya anu balanja kaén samping, iket, geulang, asbak jeung lianna. Tuluy kabéh
naraék beus indit balik ka Jatinangor.
Teu
karasa geus nepi ka Jatinangor.
Tuluy baralik ka imahna sewang-séwangan. Nepi ka imah, kuring langsung saré sabab capé pisan. Isuk-isuk kuring hudang.
Dihudangkeun ku Ema.
Kaciri si Bungsu
keur dahar bari nongton tipi. Kuring ka kamer cai tuluy solat. Bérés solat
tuluy ninyuh kopi. Bari moyan di buruan. Torojol Ema nyampeurkeun. Hayang ngobrol jigana mah pangalaman anu geus kuring boga
tiditu.
“Kumaha Jang betah teu diditu téh? Tanya Ema bari mawa goréngan.
“Betah pisan Ma. Tiis ceuli hérang panon. Jalmina
harandap asor. Mung arisinan.” Jawab kuring bari nyuruput kopi.
“Euleuh-euleuh. Geuning kitu nya saé atuh. Kumaha éta téh sarakola teu jang barudak atawa pemudana?” Tanya Ema beuki panasaran.
“Henteu Ma. Rata-rata pamegetna ngajaga huma.
Istri na ninun.” Témbal kuring.
“Atuh geuning teu sarakola? Teu baroga
élmu meureun ? Tuluy ari agamana naon Jang?”
Ema beuki panasaran.
“Nya teu sakola ogé geuning tengtrem diditu mah ma. Kabéh
alakur. Teu aya pisan papaséaan. Teu kudu mikiran tuangeun sabab sagala aya.
Lemah cai na ogé
subur makmur. Teu jiga didieu, ngadan dijualan ka batur geuning Ma. Agamana mah Sunda Wiwitan ma.” Témbal kuring.
“Éh apanan cék hadis ogé hirup mah
kudu nyiar élmu. Atuh musrik Jang?
Teu mangéran ka Allah
meureun?” Témbal Ema.
“Ah buktosna ogé geuning arurang diajar ppkn angger wéh anu paraséa mah paraséa. Aturan seueur anu
dirumpak. Diajar biologi ongkoh tapi teu ngartos upami tatangkalan di babad téh bakal ngaganggu ékosistem
teras nyababkeun banjir sareng longsor. Kajabi geuning kiwari mah taneuh téh ngadon digentos ku
beton. Teras agama ogé diwewelan ti alit kénéh. Tapi punten-punten, maenya korupsi beuki
ngaraja? Goréng haté, kufur nikmat kana kabeungharan alam anu parantos
dipasihan ku Allah? Éta mah hak-na Ma. Anu penting mah hirup hurip teu
ngarogahala.” Teges kuring.
“Ujang mah puguh miharep téh dunya jiga kitu. Tengtrem subur makmur gemah
ripah loh jinawi.” Sambung kuring semu jamedud.
“Enya tapi kan lamun jauh ti Alloh mah sia-sia atuh kabéh anu geus dilakonan téh!” Témbal Ema.
“Muhun Ma leres. Anu uninga mah mung Alloh anu parantos ngatur sagalana. Urang
mah kantun nurutan anu saéna sanaos ti jalmi anu jauh tina élmu. Ari saé mah
tuturkeun waé Ma.
Mung urusan kayakinan
mah keun waé da urang teu tiasa
maksa
batur kedah sami sareng urang.
Kapan
Alloh gé nétélakeun yén urang kedah sukur
ka samudaya anu parantos dipaparin. Hartosna urang kedah ngahargaan urang
kanékés anu dugi danget ayeuna tetep kénéh ngamumulé budaya sareng kabeungharan alam anu parantos
dipaparin ku alloh.” Jawab kuring.
“Muhun kahadé Ujang ogé kedah tiasa jiga kitu atuh ari kitu
mah. Sok turutan. Anu
alit heula wéh. Sukur ka Alloh
anu parantos maparin ujang élmu anu sakitu seueurna. Mugia ujang mah janten
jalmi anu imbang. Antawis agama jeung budaya. Ulah dugi ka paguntreng. Tapi candakan anu
saéna. Piceun anu awona.” Tembal Ema
bari indit ka jero.
Kuring teu ngajawab nanaon. Sabab kuring
rumasa acan
bisa neuleuman duanana. Matapoé
ngusap kulit ku haneutna. Ngan angin embung éléh nyocoan awak kuring nepi ka ngadégdég.
Tidak ada komentar:
Posting Komentar